Dadda Ɛedduq - Tamacahut s Tmaziɣt - Salem Zenya

Aḍris ullis: Tamacahut s Tmaziɣt
Salem Zenya, Yella zik-nni

Dadda Ɛedduq

    Zik-nni, yella yiwen n umɣar, yesɛa snat n teslatin. Yiwet d tuḥrict, tayeḍ d tabuhalt.Yiwen wass, qqiment kan, dɣa nnant-as:

- Ay amɣar! Ilaq ad neẓẓu ibawen!

Yenna-asent:

- Ad neẓẓu ih!

Fkant-as ibawen, aqabac, iruḥ. Akken yuweḍ anda ara yeẓẓu, yelluẓ dɣa iselxes ibawen-nni, yečča-ten. Asmi i d-yuweḍ lawan ideg ara d-wejden, smektint-t-id :

- Ay amɣar! Ibawen-nni i aɣ-teẓẓiḍ, tura ahat wejden-d, d lawan?

- Wejden!

- Sken-aɣ-id ihi anda-t lmelk-ik, ad d-nekkes?

- Ruḥemt ɣer tiɣilt-inna, teṭṭfemt taɣerbalt, tserrḥemt-as, anda terra d wina i d lmelk-iw.

Ruḥent, mi uwḍent ɣer din, serrḥent-d i tɣerbalt, terra ɣer yiwen n lmelk; ibawen deg-s anect-ila-ten, ziɣen d ayla n tteryel. Ttekksent, ttekksent, almi d-telḥeq tteryel:

- Lɛeslama nkent, a la tettekksemt ibawen!

- A la nettekkes deg wid i aɣ-yeẓẓa umɣar nnteɣ.

- Yyah! Yyamt ihi ad teddumt s axxam.

Ddant, tefka-asent-id acewwaḍ; tuḥrict-nni imi tt-teɛqel d tteryel, tettarra-t ɣer yiciwi-s ma d tabuhalt-nni ur tt- teɛqil ara, tečča acewwaḍ-nni...