Ǧeḥḥa d uɣyul-is. Aḍris ullis, d tamseḍsut.

Djehha et son âne. Texte narratif - humour / blague:

 Am yal tikkelt, ǧeḥḥa yettaɛraḍ ad isellek aqerruy-is s kra n tiḥerci. 

Seg : Auguste Moulieras.
Les fourberies de Si Djeha

 Ǧeḥḥa d uɣyul-is.

             Acebbub-is d awraɣ am wureɣ, kersen wanẓaden deg-s, icubaɣ rran tawenza deg yidis, allen-is d timeqqranin brarḥent, ṭṭurcent. Yuba, mmi-s n udrum-is, ila anagar ṣa n yiseggasen deg tudert-is. Meẓẓi mliḥ di lqedd. Taqerrut-is d tubrint, tekkernenni am tciret n uḍar, timeẓẓuɣin-is d timeẓẓyanin, ayen slant skelsent-t, leḥnak-is d iberkanen ad as-tiniḍ zzan seg yiṭij, udem-is yezga yennecraḥ, taqemmuct-is tettecmumuḥ, tuɣmas-is d ticebḥanin am udfel, yettcercur d sser dayen kan.

 Yal ass, sin-agi n warrac ddukulen, ttaɣen adrid n uɣerbaz, teddun afus deg ufus, wa ur yettaǧǧa wayeḍ, ttemzukraren kan di sin. Tturebban i sin yid-sen, ur xebbcen, ur ttkerricen, ayen n dir xḍan-as, urǧin ttnaɣen deg yiberdan neɣ ttawin-d tilufa i yimawlan-nsen. D ukyisen, mi ara ten-id-temlaleḍ, ur ten-tzewwireḍ ara ɣer wazul. Mi ara d-ffɣen seg uɣerbaz, teddun-d srid s axxam, ur tezzin ur tennḍen deg yiberdan. Ferzen lecɣal-nsen akken ilaq, ussan-nsen ččuren d tigawt. Mi ara awḍen s axxam,yal akud deg-s amaynut. Cwiṭ i uqesser d wurar, cwiṭ i ulmud d unadi alamma gnen.

 Deg yimi n medden, ala win ara d-yinin fell-asen ayen yelhan: d arrac uḥricen, tturebban.

© Image copyright Google Maps

    Aɣerbaz amenzu El Imam El Hewwari d amecṭuḥ, yella deg tlemmast n temdint n Wehran. Yezga-d deg uzniq Philipe, nnig n yiɣrem aqbur akk deg Wehran Sidi Lhewwari. Yebɛed s wazal n 100 n lmitrat ɣef umraḥ n yimrigen.

 
    Ɣef tama-s tazelmaḍt, tella tmesgida (lǧameɛ) El Baca, i bnan Yiṭurkiyen deg useggas n 1796. Nnig-s, seg tama tayeffust, yella leqṣer El Bay, yettwabnan daɣen deg tallit n Yiṭurkiyen asmi llan deg tmurt-nneɣ.

    Aɣerbaz daxel, yesɛa seddis n tneɣriyin, asira n tnemhalt, taxxamt n uɛessas d umraḥ amecṭuḥ, deg-s tturaren yinelmaden mi ara d-ffɣen seg tesmilt.

    Sselmaden deg uɣerbaz seddis n yiselmaden n taɛrabt, yiwen n tmaziɣt, wayeḍ n tefransist. Aɣerbaz El Imam El Hewwari, gar yiɣerbazen iqburen (iqdimen) deg Wehran, bnan-t Yirumyen deg useggas n 1881.

    Ɣur-i tecba lsas iɣef ibedd uxxam, ma yella yuweḍ-d wass tebɛed fell-aneɣ, ssqef ɣef uqerruy-nneɣ ad d-yeɣli. Tecba adlis i yesselmaden imeɣri, imi d nettat i d tala anida swiɣ aman asmi ffudeɣ, d nettat iyi-d-yefkan acḥal d tamsirt ddiɣ yis-s di ddunit-iw. “Zuhra”, neɣ akken tettwassen deg taddart: “Nna Ququ”, ma yella ɣur-nneɣ deg uxxam nessawal-as: “setti Ququ”, d setti, d tin i yesɛan 84 n yiseggasen.

    Ahat aṭas ara as-yinin; acu i tesɛa temɣart-a akken ad tt-id-neglem? Acu kan win i yesɛeddayen yid-s acḥal d iseggasen ara yakzen tamsalt. Tura meqqret, mačči d tin n yiḍelli; acebbub-is yezga iɣelli, aksum-is yezga yettkemil deg ukmac yerna teḍɛef mačči d kra, imi akk-a i d lḥal n win yerra waṭṭan d arfiq, ladɣa ma meqqer. D acu kan win i tt-yeẓran 5 n yiseggasen ɣer deffir, ad ak-yini: “teskiddibeḍ!”, d tidet, acku mačči akka i tella, annect-a d ayen ẓrant wallen-iw, yerna ula d win i tt-yessnen seg zik, yezga yettawi-tt d amedya deg lǧehd, sliɣ ula ɣer medden qqaren: “teddem ayen ur ddimen 10 n yirgazen”.

    Qqaren-d ɣef wasmi tella d tilemẓit, tella ɛlayet, yerna zuret, ini n uksum-is yemmal ɣer tebrek, ar tura mazal-itt akken, allen-is mazal-itent akken itent-id-gelmen wid itt-yessnen asmi tella meẓẓiyet, d tiberkanin, ur meqqrit, ur meẓẓiyit, ma yella d axenfuc-is d ameqqran.

    Ma yella uɣaleɣ-d ad d-mmeslayeɣ fell-as akken tella lawan-a, mačči d kra ara d-iniɣ, ayen i d-uriɣ akk uqbel, ass-a ijmeɛ-it-id wussu, ur tuklal ara, zik-nni texdem axxam terna berra, ass-a tegra-d weḥd-s, deg uxxam ur tessin tuffɣa ɣer berra. Anwa ara yamnen !? Tin akken ttawin d amedya deg lǧehd, ass-a ad as-deɛɛun medden ad yili Rebbi yid-s, neɣ ma yella izad fell-as waṭṭan ad qqaren: “Ad tt-yejmmeɛ Rebbi axir”. Meɛna am wakken qqaren: “ɣas yekmec uksum, ur kmicen wulawen”, d tidet acku mazal ṭṭbiɛa-s ur tbeddel ara, mazal taḍsa tezga ɣef wudem-is, ɣas ahat ul-is ur yelli ara d win yesɛan lxaṭer ad yeḍs, mazal-itt tettmuddu-aɣ leḥmmala d leḥnana-ines yal mi nerza ɣer-s, ula d timucuha mazal tettawi-aɣ-tent-id yal mi ara d-nennejmaɛ nekk d warraw n ɛmumi, tezga deg-neɣ d aweṣṣi, tesfaqay-d wid iɣeflen seg-neɣ akken ur iɣelli ara ɣer lqaɛa, neɣ ma yella win ad as-tini “kker a mmi fell-ak, mačči d lɛib win yeɣlin, d lɛib win yeɣlin ur ur yekkir ara”, mebla ma ttuɣ ddɛawi n lxir i aɣ-d-tdeɛɛu yal dqiqa, ama i nekkni, ama i wiyaḍ.

    Telha ddunit aṭas limer ur ttissinen medden aṭṭan akked lmut, meɛna akka i tt-yexleq Rebbi, deg-s tudert, deg-s lmut, deg-s aṭṭan, deg-s ḥellu, tbedd ɣef waṭas n tenmegliwin, yiwen ur yezmir ad iger afus-is akken ad ibeddel ayen yura Rebbi, cwi kan ttɣamant-d yid-neɣ ccfawat nettaḍsa mi akken i tent-id-nemmekta, ɣas ulamma ahat llant tid i ixenqen ulawen si leḥzen d wallen seg yimeṭṭi.

    Timgad neɣ Tamugadi, d yiwet n temdint taqdimt i yellan deg lwilaya n Tbatent (Batna), i d-izegren aṭas n leqrun, mazal ar ass-a later-is d lbenyan-is. D tamnaḍt i d-ǧǧan Rruman, xedmen-tt akken ilaq, ama d ixxamen-is, iberdan-is d wayen niḍen. Rruman, yal aḥric fkan-as azal-is, ɣef waya i xedmen leswaq, tiḥuna, lḥemmamat, amezgun ...atg.

 
    Tesɛa Timgad tamkerḍit tameqqrant n yidlisen, tezga-d deg tlemmast n temdint. Tamdint-a tamecṭuḥt, yettwazedɣen sɣur kra n yimezdaɣ, yettwassnen s lehna d talwit deg temɛict-nsen. Daɣen d tamdint n tfellaḥt d wuẓẓu, ttekken-as-d waman seg ubaraj n Kedyet Medwar i yellan dinna deg Timgad, akken daɣen i yessawaḍ aman n tissit yelhan arma d tamdint n Batna.

    Ɣerdaya, d yiwet n twilayt seg twilayin n Lezzayer, s tmaziɣt neqqar-as Taɣerdayt. Tezga-d deg ugafa n tneẓruft (sseḥra) n tmurt-nneɣ. Tebɛed s 600 km ɣef Lezzayer tamanaɣt. Tilisa-ines, seg ugafa ḥerrent-tt-id twilayin i wumi ssawalen tiwwura n sseḥra, Leɣwaṭ akked Ǧelfa, seg umalu d tiwilayin n Lbeyyeḍ d Adrar. Seg usamar d Wergla, ma seg unẓul d Tamenraset. Yuweḍ umḍan n yimezdaɣ n Ɣerdaya ɣer 93423 d amezdaɣ deg useggas n 2008.

 
    Ixxamen-is am leqsur, bnan s uẓru d wakal iṣeḥḥan. Talemmast n temdint tettemcabi ɣer tqessult (aḍebsi). Imezdaɣ-is d Imẓabiyen, ar ass-a, ṭṭfen deg wansayen-nsen (leɛwayed-nsen). Qeddcen deg temguri taqburt, am tzerbit n Ɣerdaya yettwassnen aṭas, xeddmen daɣen iselsa n leqṭen am ubernus, akked nnqec ɣef nnḥas d usɣar d lxedma n uglim d ufexxar. Sɛan lɛid n tzerbit i d-yettezzin yal aseggas. Mazal-iten ttmeslayen (heddren) tamaziɣt (tumẓabt).

 
    Ɣerdaya d tamnaḍt n tmerrit d uḥewwes. Tettwassen s sebɛa leqṣur, yal wa seg wanisa i tt-id-iḥudd, ttwaxedmen deg yiseggasen n 1000, 1300 d 1600 (Tajnint, At Bunura, Taɣerdayt, At Yezgen, At Mlict, Iguraren, At Beryan).

 

    Ilul Diego Armando Maradona ass n 30 tuber 1960, deg uzniq Lanus deg tama n Buenos Aires deg n tmurt n Argentine (Marikan n wadda). Yettuneḥsab d amyurar ifazen deg umezruy n ddabex uḍar deg umaḍal merra.

    Maradona d azuran n tfekka, d awezzlan. Aksum-is d acebḥan, anzaren-is meqqrit acemma, allen-is d timdewrin, d tiberkanin. Aqerruy-is d imdewwer, ma d acekkuḥ-is yekkerṭuṭi (d akerṭuṭfan). Ahat d tewzel-nni-ines i t-iɛawnen akken ad yeg afernas deg yixṣimen-is.

    Segmi yella meẓẓi i yettwaseḥḥer s ddabex n uḍar. Asmi yuweḍ 18 n yiseggasen, yella deg wumuɣ n yimyuraren n Argentine i yewwin taqbuct n ddunit deg 1978, maca ur d-yekcim ara ad yurar. Yurar deg terbaɛt n Boca Juniors deg useggas n 1981, syin tessawel-as-d terbaɛt n Barcelone deg useggas n 1982, . Asmi i d-yufrar, tuwi-t terbaɛt n Napolé deg useggas n 1984, dɣa imir i yebda yettferfir deg yigenni wis sebɛa, yerfed tarbaɛt-a tamecṭuḥt ɣer tqacuct, yuwi yid-s talɣuɣa n tmurt n Ṭṭelyan akked teqbuct n l’europe .

    Akken daɣen i yella d lqebṭan n terbaɛt n Argentine deg teqbuct n ddunit 1986 i d-yellan di tmurt n Mexique, imir dɣa i iga axessar deg waṭas n tmura. Deg temlilit sdat terbaɛt n Legniz ara yeqqimen deg umezruy, yuwi-d sin n yiswiyen yessewhamen, amezwaru s ufus-is i t-iɛawnen, war ma ifaq yiwen armi i tfuk temlilit, dɣa imir i as-fkan isem (Afus n Rebbi), iswi wis sin, izger-d akk i unnar, yesseɣli qrib merra imyuraren ixṣimen, yegla s uɛessas, yuwi-d iswi.

    Ayen i yeǧǧan Maradona ad d-yufrar gar waṭas n yimyuraren i ifazen di ddunit, d imi yella d ameddakel n yimeɣban, anida bɣun ilin, acku ur yettu ara ansa i d-iɛedda, rnu d amallal n tlufa tuɣdimin, u d amḥaddi n tmura yenṭerren.

    Asmi i yeḥbes urar n ddabex, yuɣal d asleɣmay, ɣas akken ur iɛeṭṭel ara. Ur yeḥbis ara assaɣen-is akked ddabex uḍar, aṭas n temliliyin timeqqranin i wumi yeḥḍer, dima yettak-d ṛṛay-is. Yetturar weḥd-s anida yezdeɣ. Acḥal n tikkelt i yuḍen, acku tennerna tfekka-s s waṭas di lmizan, maca isellek, armi d ass n 25 di wunbir 2020, dɣa teḍra-as tezɣent n wul, ur iɛeṭṭel ara, yemmut ɣef leɛmer n 60 n yiseggasen.

    Yeḥzen umaḍal merra ɣef tmettant n Maradona. Yeǧǧa-d isem-is deg umezruy n ddabex d umezruy n umaḍal s umata iɣef ara tecfu talsa.

    Axxam n twacult n At Wulmu yezga-d d amezwaru ɣef tama tayeffust n ubrid i issekcamen ɣer taddart n Tewrirt. Tawrirt ur meqqert ara, taxlijt tɛedda-as, taddart ur tuwiḍ ara, d talemmast n tudrin. Ansa i as-d-tekkiḍ d asawen, tebna ɣef tqacuct n yiwet n tiɣilt tamecṭuḥt, ɣef waya i as-fkan yimezdaɣ imezwura isem-a n Tawrirt.

    Ixxamen-is d tirni bnan s uẓru d wakal, wa isenned ɣef wayeḍ, i ten-yebḍan ɣef sin n yiḥricen d azrib alemmas yettawin srid ɣer tejmaɛt yellan deg tama meḥsub teqernit n taddart n Tewrirt. Din i ttnejmaɛen yimezdaɣ n taddart ma tella kra n temsalt i ten-iceɣben ad tt-frun s wawal i d-yettilin gar-asen tal tikkelt mi ara qqimen deg lḥeqq. Ɣef tama n umalu i d-yettqabalen d tala n taddart. Tsenned ɣef yiwen n uẓru d ameqqran yuɣalen d yiwen uɣrab n tesqif i as-bnan. Abrid yettawin ɣur-s yesgesser cwiṭ mi ara d-tekkeḍ syin. Ma ɣef tama n usammer d yiwen n uxxam d ahrawan i rran at taddart d lǧamaɛ. Lǧamaɛ n taddart n Tewrirt yesɛa sdat-s yiwen n ubraḥ d ameẓẓyan, fergen-t-id ukkuẓ n leswar, deg tlemmast n win yessuffuɣen s abrid i tella tewwurt n usɣar n ukerruc mm sin n lelwaḥ. Syin i d-keččmen diɣ i teffɣen yimẓulla. Win iḍefren tanila n ugafa ad yerr srid s adrar anda i ttawin yimeksawen n taddart lmal-nsen ad ikes. Akal i d-yezzin i taddart d tiferkiwin n yimezdaɣ-is. Deg-s nezmer ad naf ddeqs n tewsatin n yisekla, tuget deg-sen d tizemmrin yuwin amur ameqqran, syin akkin d tineqlin akked tjunan. Ma d isekla n wulmu d uslen i d-yettakken leɛlef i lmal, ẓẓan ɣef leryuf n yiɣewdan deg umkan n yinijel i d-imeqqin anda i as-yehwa.

    Imezdaɣ n taddart n Tewrirt am yimezdaɣ n tudrin merra n tmurt n Leqbayel. Ttrebbin lmal, xeddmen tafellaḥt, llan wid yettinigen ɣer tmurt n Fransa. Ulac axxam ur nesɛi ara ulamma yiwet n taɣaḍt i tuẓẓga n uyefki. Tameṭṭut timnifrit yettrebbin lṭufan, ma yella iruḥ-as uyefki ur as-d-ittnuj ara, tettakk i mmi-s akken ad yimɣur, ayefki n taɣaḍt.

    Ɛebban Remḍan ad fell-as yeɛfu Rebbi, d yiwen umeɣras gar yimeɣrasen i d-tefka tmurt n Lezzayer di tallit n umnekcam afransis. Ilul di Larbɛa Nat Yiraten ass 10 di yunyu 1920, yefka tudert-is d asfel ɣef wakal d yimal n tmurt.

    Ɛebban Remḍan yefka-d afud d waṭas n rrezg i wakal d tarwa n Lezzayer, almi d asmi yuweḍ ɣer wani ara naweḍ, yemmut ass 27 di duǧember 1957, send timunent n Lezzayer, di leɛmer-is 37 n yiseggasen.

 

Tasɣunt Aselmad

Uṭṭun 8 - Yennayer 2021