Tazemmurt Tazemmurt d aseklu yeggten di temnaḍin i d-yezzin i yilel Agrakal. D azamul n talwit. Tazemmurt tḥemmel aṭas n tafat. Ɣur-s tafga d tuntimt. Iferrawen-is d adalen, am unebdu, am tegrest. Tezmer ad tidir aṭas n leqrun. Agummu i d-tettarew tzemmurt qqaren-as azemmur. Tetten-t medden akken d azegzaw neɣ mi ara yuɣal d aberkan. Maca amur ameqqran d iẓid i t-ẓẓaden, tekksen-d seg-s zzit. Medden akk ḥemmlen zzit acku tetten-t yerna ssejjiyen yis-s aṭas n waṭṭanen.

    Zik, di lawan n lexrif, ttruḥun ṣṣbeḥ wigad yesɛan urti n tneqlin ad d-kksen tibexsisin, ma d iɛeqqayen n yiniɣman ad ten-lwin ɣer lqaɛa ad ten-ǧǧen alamma d tameddit, ad d-uɣalen ad ten-leqqḍen ad ten-fesren ɣef yifuga yettwaxedmen s uɣanim. Mi qquren ad ten-smiren ɣer umisur, arma yeččur d tazart. Mi ara d-taweḍ taggara n lexrif ad ten-id-jemɛen: wigad lɛali ad ten-zziǧwen, ma d ayen i d-yettɣimin seg-sen ad yeqqim i lwacul. Tiwsatin n yiḥbuben mxallafent akken mxalafent tneqlin. Llant tigad lexrif-nsent yelha i tazart am tnqelt n deffuyt, tin n tɣanimt lexrif-is n ujenjar akked lexrif n buyeḥbul; ma d tid lexrif-nsent ur ilehhu ara i tazart ad naf tanqelt n uleqqaq, tin n uɣanim imi lexrif-is iwettu di ṭṭejra, tella daɣen tenqelt lexrif-is d azewwaɣ, d aḥercaw, yella daɣen win iwumi qqaren lexrif n teɣliḍt, mi yewwa mliḥ ad yuɣal d aman ad d-yeɣli. Llan daɣen lexrif n ubuɛenqiq, n ubarak akked ubakur. Ma d lexrif n ubuɣenjur iḥbuben-is lhan i tezmert fernen-ten ttarran-ten di zzit n uzemmur ur kkin waman mi d ṣṣbeḥ feṭṭren fell-asen.

      Taẓebbujt-n-Tafat d aseklu; ulac win i tt-yugaren deg temɣer deg taddart nneɣ. Ad d-qaren yimezwura akken i tt-id-nufa. Ṭṭef-d seg Yiɣzer alama d Tiɣilt, ulac ayen i d-yufraren am Tẓebbujt-n-Tafat. Nḥemmel iɣimi ddaw-as, ɣef teblaḍin i as-d-yezzin. Nettalas akk deg-s; ur tesɛi ara bab.