Timecreḍt - Racid Allic

 Timecreḍt - Aḍris ullis - Racid Ɛellic, Faffa.

        Cfiɣ-d akka am wass-a; ass-nni d timecreḍt ; taṣebḥit, neffeɣ s warrac, ad neks izgaren ara yemmezlen, ad d-nekkes afersiwan ɣef waydeg ara yettwafser uksum. Nɛebba i yiɣyal tibettiyin.


        Timecreḍt n useggas-nni ur d-tettuɣal ara! Axerrub-nneɣ yezla tayuga n yizgaren; qedceɣ ayen i wumi zemreɣ; mi yebḍa uksum, yeffeɣ d tiwezzaε, d nekk i wumi i d-yefka dadda asegres n wayen i aɣ-id-iṣaḥen. Akka d-nekka, d dadda i d-yessawaḍen asegres-agi mi ara ifak leqdic deg unnar. Yeɣli-d yigenni fell-i neɣ uliɣ ɣur-s.

Mi d-ssawḍeɣ s axxam, cfiɣ amek i ixeddem dadda; ad yessers asegres ɣef yidis n jeddi. Jeddi, ad fell-as yeεfu Ṛebbi, meqqer, yenqes-as yiẓri, ad inaqel asegres s wayen yezmer, ad yeltef aftat neɣ sin, ad yini: «yella lxir» …


        Ur tettuɣ imensi n wass-nni. D setti i iferrqen; Jeddi yettaxren i wučči n uksum, ass n temcreḍt d wass n lεid yettḥaz amur-is, tsemmed-as aftat d ayen kan, yeṭṭef-it s sin yiḍudan, yessawel: «Anda-k a Ɛmer?». Dɣa yefka-iyi amur-is s tgallit. D aya i wumi d-cfiɣ.