Sin yiɣiden d wuccen - Taneqqist

Sin yiɣiden d wuccen - Taneqqist s tmaziɣt.
Fable en tamazight, le loup et les deux chevreaux.

    Amacahu, Rebbi ad tt-isselhu,ad tiɣzif amzun d asaru!

Yiwen wass di tegrest, dduklen sin yiɣiden, tteddun s axxam. Deg ubrid-nsen, mlalen-d Mḥend Uccen. Akken kan i ten-iwala, ur tuwi-t ara lqaɛa si lferḥ. Dɣa yenna-asen : « ɣer wanida i tettɣawalem a tarwa ? » Nnan-as : s axxam a Dda Mḥend.

Yezzi wuccen ɣer umezwaru deg-sen, yenna-as :

- D acu-tent tigi i d-tewwiḍ ɣef tqerruyt-ik ? Iɣid-nni yuggad,yerra-as-id s urgagi d usqewqew :

- D t…d t…d tacciwin !

- I tigi iɣef tbeddeḍ, d acu-tent ?

- D t…d t…d tiqejjirin.

- Ihi, acuɣer i tettergigiḍ ?

- U…u uggadeɣ ad iyi-teččeḍ !

Mḥend Uccen yumer mi t-yuggad yiɣid. Yuɣal yezzi ɣer wis sin, yenna-as : « I kečč, d acu akka i d-tewwiḍ ɣef tqerruyt-ik ? » Iɣid, icuff idmaren-is, yessuzer taɣect-is, yerra-as-id :

- D acciwen s way-s ara k-fetkeɣ, ma ur tettaxreḍ ara seg ubrid-nneɣ.

Yuɣal yenna-as Mḥend Uccen :

- I tigi iɣef tbeddeḍ, d acu-tent ?

- D tidebbuzin is ara k-debbzeɣ, ma tkemmleḍ-tt aka.

- Ayɣer ihi tettergigiḍ?

Iɣid, yebda yekkat s tqejjirin n sdat, yettcuffu, amzun d azger, yenna-as: « ḥareɣ, ḥareɣ melmi ara k-ččeɣ, ttraǧuɣ kan ad tfakeḍ ameslay. ! » Asmi i iwala wuccen ur t-yuggad ara yiɣid, yuɣal icukk deg yiman-is, tekcem-it tuggdi . Imuqel akkin d wakka, yebda yettaker taqejjirt cwiṭ cwiṭ armi i yezzerweḍ d tarewla …ula d nutni maɣef ad yendem wuccen, ad d yezzi ɣur-sen.

Tamacahut-iw tefra am uɛeqqa di tferka.

Naser Uzerraq