Tamɣart akked yennayer, tamacahut - BELƐIDI Lyas

Aḍris ullis, tamacahut: Tamɣart, iɣiden akked yennayer
Mass; BELƐIDI Lyas.

Qqaren deg wawal: A yiles yellan d aksum d acu i k-yerran d asennan !? Imi yella wawal aẓidan, iwumi tiɛewji! Iles tikwal d netta i d lada, i d-yettawin tiyita i uqeṛṛu.

Amacahu! Init ahu, win i d-yennan ahu ad yaf lhu. Tamacahut-iw ad telhu ad tiɣzif anect usaru. 

    Ḥekkun-d ɣef yiwet n temɣart tettidir akked yiɣiden-is deg yiwen n uxxam i d-yezgan deg tlemmast n teẓgi. Ayen akk tekka tegrest tamɣart ur d-ssuffeɣ ara tiɣeṭṭen-is ad ksent.

    Yiwen wass gar wussan ineggura n wayyur n yennayer; igenni d azegzaw, iṭij yuɣ tamurt amzun d ass n tefsut. Tamɣart tazemnit mi twala addad n tegnawt igerrez, d ass yelhan i teksawt. Teddem tebra-asen i yiɣiden, tessufeɣ-iten-d seg uddaynin. Uɣen abrid ɣer udrar imi din i yella leḥcic yelhan.

    Mi uwḍen ɣer udrar, tamɣart tserreḥ-as i lmal ad ikes. Iɣiden ferḥen aṭas, acku ddeqs aya ur d-ffiɣen ara seg uddaynin. Lmal yečča, yefraḥ bab-is. Tamɣart teqqim ɣef yiwen n uẓru tettwali deg yiɣiden-is yeksan akked ugama icebḥen. Tamɣart, seg lferḥ-nni, tebda tcennu, tettawi isefra. Deg yimeslayen-is tettmesxir ɣef wayyur n Yennayer. Teḥqer-it imi ur teqsiḥ ara ccetwa deg-s, yerna ur d-yuwit ara udfel. Tamɣart teqqar-as : « Beẓtek a Yennayer, ffeɣ ur texdimeḍ ara. Beẓtek a yennayer, ffeɣ ur texdimeḍ ara». Tettales-as-d i yimeslayen-a deqs n tikal.

    Ayyur n Yennayer; yesla-asen-d i yimeslayen n temɣart. D awalen i t-ijerḥen aṭas, yerfa mačči d kra. Yennayer yessawel-as i wayyur yellan sdat-s, wagi d ayyur n Furar. Yenna-as: « A ɛemmi Furar rḍel-iyi yiwen wass ad nɣeɣ tamɣart m lɛar akked yiɣiḍen-is».

    Ayyur Furar; yesla-as-d i Yennayer. Yeqbel ad as-id-yerḍel yiwen wass. Deg yiwet n teswiɛt addad n tegnawt inbeddel. Igenni yuɣal d aberkan, yeɣli-d usemmiḍ, aḍu yettsuḍu s lǧehd. Yeṭṭerḍeq lebreq, iḍfer-it rrɛud. Tiwwura n yigenni ldint, iɣelli-d udeffel d imeččimen. Tamɣart texleɛ, tewhem. Truḥ ad d-terwel maca ur tessaweḍ ara. Asemmiḍ d ugris d waḍu ur as-ǧǧin ara. Din i teqqim alammi tesger nettat d yiɣiden-is. Uɣalen d izeblac, qquren amzun d iẓra.

    Tamacahut-iw tekfa. Uwiɣ-tt-id i warraw n lejwad. Ufhim ad tt-yissin; ungif ad tt-yer deffir uɛrur-is. Imcumen ad ten-yexdɛɣ Ṛebbi, ma d nekkni ad aɣ-yeḥrez, ad aɣ-iṣṣun.

Belεidi Lyas - yebrir 2017

Tasɣunt Aselmad Uṭṭun 1ru