Aseḥbiber ɣef waman n tala, zik - MESSAOUDENE Fahim

Aḍris imsegzi
Aseḥbiber ɣef waman n tala, zik
Fahim Mesɛudan

At-zik ḥerzen aman, ur swaɣayen ara deg-sen tiqit. Yal tiqit ara d-yeqqiṭṭren ssnen amek ara tt-jemɛen. Aman n tliwa, ussan-d di leɛwanser yellan deg yidurar, ttawin-ten-id yimezdaɣ n tuddart deg yijeɛbuben s ddaw tmurt, alarmi d taddart.

Ulac taddart ur nesɛi tala. Tala d amkan n tlawin kan, yecmet ad yekcem ar daxel-is urgaz deg uzal. Lebni n tliwa yemgrad si taddart ar tayeḍ, maca yella wayen tent-yesdukklen. Ad naf Lebni n tliwa-agi yebḍa ɣef krad (3) yiḥricen : Acercur, amraḥ n tarda, asariǧ n lmal. Akken tt-id-ǧǧan yimezwura, aman-is d iẓidanen. Tala d amkan n tlawin, d lbaḍna-nsent ... Ur tesɛi ara tawwurt.

1. Acercur, d amkan yeṣṣren deg i d-ttagment tlawin aman, i d-taččarent tiḥellabin-nsent.

2. Abreḥ n tarda: d amkan yeṭṭeɛ ɣer ucercur, yebḍa-ten kan ṣṣur d amecṭuḥ. Lqaɛa-ines tqeɛɛed, deg-s i ssirident tlawin iselsa, iceṭṭiḍen kan. Yezzi-as-d ṣṣur azal n lqedd n umdan, ala ciṭuḥ n umkan deg i keččment tlawin, akken tulawin ad ssirden-t s tuṣṣra. S daxel-is yella usariǧ d aɣezzfan, maca ur lqay ara, deg-s i d-tteffint aman. D aman n ucercur yettruḥun di rrayeɛ i yettaččaren asariǧ-agi.

3. Asariǧ n lmal: d asariǧ yeṭṭɛen ar ubreḥ n tarda, ur ɣezzif ara, ur lqay ara. D amkan deg-i i tess lmal, yettili-d ar tama n ubrid, d aman d-yettfeggiḍen deg usariǧ yellan deg ubreḥ n tarda i t-yettaččaren d aman d-yettagaren i yettsurugen ar dinna.

Aman yettcercuren deg usariǧ n lmal, ttruḥun di terga, ijmaɛay-iten ugelmim. Aman ugelmim swayen yis-s tibḥirin deg unebdu. Tessen deg-sen yiɣersiwen n teẓgi, ibeɛɛac d yijeqqiwen.

Fahim MESSAOUDENE

Tasɣunt Aselmad

Uṭṭun Wis 2 - Ɣuct 2017