Ixxamen n Buluɣin

24 ɣuct 1947 di Lezzayer.
Saɛid SEƐDI - Aglam n wadeg

Ccbaḥa akked tezdeg n temdinin neɣ n tudrin skanen-d aswir n yimdanen i tent-izedɣen. Ma yella yecbeḥ umḍiq ad tesεu tikti yelhan ɣef yimdanen yettidiren din ; fehmen, ɣran, zeddig wul-nsen … Ma yella amḍiq ad yili yecmet neɣ yerka d ayen ibanen imezdaɣ-is ula d nutni d imerka, teḥbes lefhama ur d-tuwiḍ ara ɣur-sen, d at wul yezdeɣ burekku, xeddmen ala di tuḥsifin.

Tiziri teṣfa, iḍ yeččur s rriḥa n lebḥer. Ad as-tiniḍ zzhir n uzal yessaggad iḍ, itteffer deg lqaɛ n lebḥer, amzun d tasusmi n yiḍ i t-id-yettsummun.

Subbeɣ-d ṭṭaq, zedweɣ ɣer tewwurt, ttmuquleɣ tamdint : texla ɣef tesɛa, rrehba-agi i aɣ-izedɣen tekcem akk imdanen n Lezzayer, tamdint tameqqrant n tmurt. Tarewla, ɣiwel s axxam, nejmeɛ. Mi sekkṛent ttbernat temmut ddunit. Azzel amer kra i d-iɣellin ad d-teǧǧeḍ arraw-ik… […]

Ɣef zelmeḍ ixxamen n Buluɣin mzuɣaren rrif rrif n ubrid, wa yeṭṭef di lḥiḍ n wa, uggaden ula d nutni. Kra deg-sen mazal bedden, llan wiyaḍ tečča-ten tewser. Wa yeqqim mebla ṭṭaq n berra, wa yeskan-d deg-s kra n tlajurin am userwal bu-tfawet.

Wissen ayen akka nettwet armi tuɣal ccbaḥa n tiṭ d asafar. Ixxamen-a tura mačči d menwala i ten-izedɣen. D ixxamen i d-ǧǧan ikulunen. Wid i ten-iṭṭfen ass-a diɣen d imɛellmen n tmurt. Ad tkecmeḍ ɣer daxel, kra n učenčun i d-yeffɣen di Fransa ad t-in-tafeḍ din.

Ad sebɣen ṭṭaq, Ad ṣeggmen tawwurt, ad ẓẓun tajeǧǧigt ara yalin ɣef leḥyuḍ, ala ! Ayen deg ara yettekki wayeḍ ɣas s tiṭ-is, ayen ara yesferḥen amsebrid, ayen yes ara teǧǧuǧeg temdint, ala ! Ɣer daxel kan, yal wa i yiman-is. Kullec i uɛebbuḍ.

Saɛid SEƐDI, ungal Askuti

Sb 90-91, Asalu 1991.