Taddart-iw tecbaḥ, temlaḥ ayen din, acku tuzga-d s ufella n tiγilt, zzin-as-id yidurar d yiγallen si yal tama, tiqucac n tγaltin dlent s umadaγ azegzaw, tiγaltin-a ttḥarabent fell-as aḍu i d-yettsuḍun seg yizuγar n wadda.

Tura udem n taddart-iw la yettitrir, yal axxam yewweḍ-it ubrid n tkerrust. leḥwari s lebni amaynut, ixxamen jeyyren s temlel, s tewreγ, yal axxam amek yettwajeyyer. Tiḥuna yal tiγmert. Deg yiḍ tiftilin yal axxam ttlejlijent am yitran deg yigenni.

Simmal la ttnernin deg-s yimdanen, simmal la ttnernin yixxamen, qrib attuγal ttamdint.

© Image copyright flickr

© Image copyright flickr

 

    Abrid ur ɣezzif mi ara tkemmleḍ tikli ad tkecmeḍ Ibacaten neɣ Imrabḍen, ixammen mferzaɛen wa nnig wa ddaw ubrid, rrif rrif tizeɣwa mcuddent ta deg ta, akken kan ara teffɣeḍ seg-s ma tḍeggreḍ allen nnig-s ad twaliḍ aɣerbaz amenzu n taddart (Muḥend Ulhanǧ ) iseqqef s uqermud d azewwaɣ, ibedd di tiɣilt yessawal i tmussni, yiwet n ddura i d-yeggran akken ad nekcem taddart Imaɣninen, amzun akken yessawal-d ssut n yimeɣrasen yemmuten ɣef tlelli, ha-tt-an Tiɣilt Iṭarnac. Udem d udem nniḍen , tettmar-d tfulki d ccbaḥa dayen kan, allen tteccḍent akkin akka akken ad walint, ddaw, nnig, yeffus, zelmeḍ, syinna ad ak-id-iban d akessar ar tala Luli, Acercar n Yimeɣninen.

    Acercar, yezyeb aṭas. Qqaren-as daɣen Asif umezyab, yettazzal d aman, yettfeǧǧiǧ yesrugmut ad as-tesleḍ si lebɛid ittawi-d tizlatin n lḥif d uɣilif n tumert d lferḥ. Aman deg-s ur ttfakan, ttazzalen-d si tɣaltin n Yiɣil d Yimdunen ideg ur tettfakka tzegzewt, sya usya mɣin-d yisekla, d yimɣan n yal tawsit, teɣzi-s azal n 50 lmitrat , di tehri azal n 20 tikkwal 10 n lmitrat, di tefsut timeqqwa-s ttuɣalent d initen am teslit n unẓar, d aggus n tteryel, tiɣimit din tesnubgay-d iḥulfan ilewwaɣen, yessifsus ɣef wallaɣ d wul taẓẓayt, issettuy iɣeblan d zzhir n temdinin.

    Yettaf deg-s iman-is yal aɛeyyal n twennaḍt, aseklu, imɣi, ajeǧǧig d ufrux, ittak nnuba i tudert, imezdaɣ d yilmeẓyen n taddart ttnubguyen ɣer din timeddiyin aladɣa deg wussan n tefsut, rrif- is llant tmizar zzint-as-d amesyas, rezzunt-d ɣer din di tallit n teknisya (ḥeblemluk) d uzemmur, ad tesleḍ kan i leɛwaq tuẓẓafin d usebrireḥ n yimeksawen, d wujaq n yiqrar mi ttmerriḥen, d kra n yilmeẓyen yekkaten snitra, tjemmaɛ-iten-id tezlit taqbaylit, ttawin-d ɣef tlufa n tudert n yal ass, ɣef tirga, ɣef usirem, tettun iɣblan d unezgum, ttaran-d i wudem taḍsa, tettfukti tegmat d tlelli din. Am waṭas n yiberdan d tudrin , yezdeɣ-itent tura layas d tsusmi, anda akk ayen iɛeddan?! Ula d iberdan msan fkan nnuba i yinijel, yemɣi-d lxuf deg umadaɣ. Acercar ifud tura, ifud ɣas ma mazal yessawal-d mi ara yettseyyix s waman, yessawal-d i wussan ad d-uɣalen, i tarwa-s ad d-smektin ussan-nni, i yimerriyen d yinebgawen ula si tmura niḍen i t-id-yettmerrin zik nni.

    Ay acercar n taddart-nneɣ, kečč d inigi n wayen iɛeddan, aqel-aɣ akken nella iḍelli, ad d-nuɣal ɣer-k yal tameddit, ad d-ncebbeḥ tiblaḍin mi asent-nettezzi zik-nni, ussan n temẓi fkan iẓuran deg-neɣ, tamurt ad d-tessawal ahaw ad as-nerr awal, ad d-neḥyu iḍelli ad t-nerr xir n zik-nni, tudrin ad tent-yeččar usirem, adrar iẓẓel-d irebbi i tarwa-s, tamurt teffud, ffuden tarwa-s.