Yemma - Benmuhub Ḥuriya (Bucali) - Aglam n umdan

Yemma – Aglam n umdan - Benmuhub Ḥuriya (Bucali)
Tasɣunt ASELMAD uṭṭun wis 8. Yennayer 2021

Ulac amdan i d-tefka teẓgi ; mebla ccekk , yal yiwen deg-neɣ yesɛa yemma-s, d nettat i d taɛwint n leḥnana. Yemma, d yiwet n tmeṭṭut ilulen deg waggur n tuber 1954 deg taddart n Macra i d-yezgan deg tɣiwant n Makuda yettekkin ɣer ugezdu n Tizi-Uzzu. Isem-is Seɛdya, d yemma-s i as-isemman akka, akken ad tesɛu sseɛd neɣ zzher di tudert-is. Tekker-d gar kraḍ n watmaten, sin warrac akked yiwet n teqcict; meḥsub d nettat i d tis ukkuẓet. Baba-s, yemmut zik acku yuḍen aṭas.

Yemma, deg tbeddi d talemmast, ur ɣezzifet, ur wezzilt, d taččurant, d tagrurzant. Aglim-is d acebḥan am udfel; udem-is, d ahrawan am uwackan n temtunt; imuyag-is neɣ leḥnak-is d izewwaɣen am ujiḥbuḍ neɣ ḥririgran. Ma muqqleɣ ɣer ucebbub-is d aɣazzfan ar wammas, annect n tseṭṭa n wayis yernu d aberkan usmix. Allen-is d tiberkanin am uɛeqqa n uzemmur, ttirriqent deg yiṭij; ma d imi-s d amecṭuḥ am tdurut, d azewwaɣ am ujeǧǧig-nni yefsan deg tefsut.Annect-agi akk d tidet maci kan imi d yemma.

Mi tebda tettimɣur ciṭṭuḥ deg leɛmer, yernu tezga tuḍen, tahuski-ines neɣ ccbaḥa-ines tebda txesser. Mi ara tt-twaliḍ ur as-teqqareḍ ara akk d nettat i yuɣalen akken. Ma ɛeddaɣ ɣer ṭṭbiɛa-s, ad d-iniɣ d tin ireznen aṭas; ur tettḥawal ara awal acku ɣur-s yal awal yesɛa azal d ameqqran. Di lecɣal d taɛebbajt, teḥrec yernu tetwel, dɣa aniwel n leqbayel, d nettat i d bab-is: ama d seksu, ama d aɣrum, ama d lexfaf neɣ lesfenǧ, ama d azeṭṭa d wayen akk nniḍen. Aṭas i lemdeɣ ɣur-s.

Yemma, ḥninet mačči d kra d acu kan ur d-tesbanay ara sdat-neɣ akken ur tt-nettaf ara fell-as. Mi ara d-ini awal d awal; ul-is meqqer, tḥemmel akk medden; yal wa tefka-as lkar-is akken i as-yenna Dda Sliman Azem. Aṭas i tesɛedda, ɣer taggara-nni-ines, texser- as ṭbiɛa seg waṭṭan amcum i tt-yuwin deg 28 yennayer 2002 deg sbiter n Balwa. Seg wassen i gziɣ inzi-nni n Wat-zik: “Win i wumi kkseɣ baba-s, ur as-kkiseɣ ara; win i wumi kkseɣ yemma-s ur as-ǧǧiɣ ara”

D tagi i d yemma , ttɛuzzuɣ-tt aṭas, ad tt-yerhem wuzmir n Sidi Rebbi, iga-as amkan di lǧennet.