Acebbub-is d awraɣ am wureɣ, kersen wanẓaden deg-s, icubaɣ rran tawenza deg yidis, allen-is d timeqqranin brarḥent, ṭṭurcent. Yuba, mmi-s n udrum-is, ila anagar ṣa n yiseggasen deg tudert-is. Meẓẓi mliḥ di lqedd. Taqerrut-is d tubrint, tekkernenni am tciret n uḍar, timeẓẓuɣin-is d timeẓẓyanin, ayen slant skelsent-t, leḥnak-is d iberkanen ad as-tiniḍ zzan seg yiṭij, udem-is yezga yennecraḥ, taqemmuct-is tettecmumuḥ, tuɣmas-is d ticebḥanin am udfel, yettcercur d sser dayen kan.

 Yal ass, sin-agi n warrac ddukulen, ttaɣen adrid n uɣerbaz, teddun afus deg ufus, wa ur yettaǧǧa wayeḍ, ttemzukraren kan di sin. Tturebban i sin yid-sen, ur xebbcen, ur ttkerricen, ayen n dir xḍan-as, urǧin ttnaɣen deg yiberdan neɣ ttawin-d tilufa i yimawlan-nsen. D ukyisen, mi ara ten-id-temlaleḍ, ur ten-tzewwireḍ ara ɣer wazul. Mi ara d-ffɣen seg uɣerbaz, teddun-d srid s axxam, ur tezzin ur tennḍen deg yiberdan. Ferzen lecɣal-nsen akken ilaq, ussan-nsen ččuren d tigawt. Mi ara awḍen s axxam,yal akud deg-s amaynut. Cwiṭ i uqesser d wurar, cwiṭ i ulmud d unadi alamma gnen.

 Deg yimi n medden, ala win ara d-yinin fell-asen ayen yelhan: d arrac uḥricen, tturebban.

    Ɣur-i tecba lsas iɣef ibedd uxxam, ma yella yuweḍ-d wass tebɛed fell-aneɣ, ssqef ɣef uqerruy-nneɣ ad d-yeɣli. Tecba adlis i yesselmaden imeɣri, imi d nettat i d tala anida swiɣ aman asmi ffudeɣ, d nettat iyi-d-yefkan acḥal d tamsirt ddiɣ yis-s di ddunit-iw. “Zuhra”, neɣ akken tettwassen deg taddart: “Nna Ququ”, ma yella ɣur-nneɣ deg uxxam nessawal-as: “setti Ququ”, d setti, d tin i yesɛan 84 n yiseggasen.

    Ahat aṭas ara as-yinin; acu i tesɛa temɣart-a akken ad tt-id-neglem? Acu kan win i yesɛeddayen yid-s acḥal d iseggasen ara yakzen tamsalt. Tura meqqret, mačči d tin n yiḍelli; acebbub-is yezga iɣelli, aksum-is yezga yettkemil deg ukmac yerna teḍɛef mačči d kra, imi akk-a i d lḥal n win yerra waṭṭan d arfiq, ladɣa ma meqqer. D acu kan win i tt-yeẓran 5 n yiseggasen ɣer deffir, ad ak-yini: “teskiddibeḍ!”, d tidet, acku mačči akka i tella, annect-a d ayen ẓrant wallen-iw, yerna ula d win i tt-yessnen seg zik, yezga yettawi-tt d amedya deg lǧehd, sliɣ ula ɣer medden qqaren: “teddem ayen ur ddimen 10 n yirgazen”.

    Qqaren-d ɣef wasmi tella d tilemẓit, tella ɛlayet, yerna zuret, ini n uksum-is yemmal ɣer tebrek, ar tura mazal-itt akken, allen-is mazal-itent akken itent-id-gelmen wid itt-yessnen asmi tella meẓẓiyet, d tiberkanin, ur meqqrit, ur meẓẓiyit, ma yella d axenfuc-is d ameqqran.

    Ma yella uɣaleɣ-d ad d-mmeslayeɣ fell-as akken tella lawan-a, mačči d kra ara d-iniɣ, ayen i d-uriɣ akk uqbel, ass-a ijmeɛ-it-id wussu, ur tuklal ara, zik-nni texdem axxam terna berra, ass-a tegra-d weḥd-s, deg uxxam ur tessin tuffɣa ɣer berra. Anwa ara yamnen !? Tin akken ttawin d amedya deg lǧehd, ass-a ad as-deɛɛun medden ad yili Rebbi yid-s, neɣ ma yella izad fell-as waṭṭan ad qqaren: “Ad tt-yejmmeɛ Rebbi axir”. Meɛna am wakken qqaren: “ɣas yekmec uksum, ur kmicen wulawen”, d tidet acku mazal ṭṭbiɛa-s ur tbeddel ara, mazal taḍsa tezga ɣef wudem-is, ɣas ahat ul-is ur yelli ara d win yesɛan lxaṭer ad yeḍs, mazal-itt tettmuddu-aɣ leḥmmala d leḥnana-ines yal mi nerza ɣer-s, ula d timucuha mazal tettawi-aɣ-tent-id yal mi ara d-nennejmaɛ nekk d warraw n ɛmumi, tezga deg-neɣ d aweṣṣi, tesfaqay-d wid iɣeflen seg-neɣ akken ur iɣelli ara ɣer lqaɛa, neɣ ma yella win ad as-tini “kker a mmi fell-ak, mačči d lɛib win yeɣlin, d lɛib win yeɣlin ur ur yekkir ara”, mebla ma ttuɣ ddɛawi n lxir i aɣ-d-tdeɛɛu yal dqiqa, ama i nekkni, ama i wiyaḍ.

    Telha ddunit aṭas limer ur ttissinen medden aṭṭan akked lmut, meɛna akka i tt-yexleq Rebbi, deg-s tudert, deg-s lmut, deg-s aṭṭan, deg-s ḥellu, tbedd ɣef waṭas n tenmegliwin, yiwen ur yezmir ad iger afus-is akken ad ibeddel ayen yura Rebbi, cwi kan ttɣamant-d yid-neɣ ccfawat nettaḍsa mi akken i tent-id-nemmekta, ɣas ulamma ahat llant tid i ixenqen ulawen si leḥzen d wallen seg yimeṭṭi.