Nna Tayaqut – Aglam n umdan
Benḥennu Buǧemɛa
Tasɣunt ASELMAD uṭṭun wis 8. Yennayer 2021
Ɣas akken deg leɛmer tezger i tmanyin, d acu tafekka-s mazal deg-s tazmert, ma dɣa d imeslayen-is d tazmert akk!
Tekna acemma, dderk-is tetterra-t ɣef uḍar-is ayeffus, ma taɛkkazt tettaṭṭaf-itt s ufus aẓelmaḍ. Tettcuddu acekkuḥ-is s tmeḥremt taberkant, d akken tefla akkit tebrej yettban-d umzur-is yečča-t ccib tuɣ-d akk deg-s temlel, ɣef lebɛid ad tenwuḍ d timeḥremt-nni i yebreqcen. Deg ssmeɛ Nna Tayaqut txuṣ, daɣ netta win ur tt-nessin ara, mi ara tettmeslay ad yenwu d iniɣ i tettnaɣ, ma d asekkud-is yeğhed ɣef lebɛid i tɛeqqel win i d-yejbun, aladɣa ma d bu uɛenqiq-nni n Smaɛil.
Lecɣal i iḍerrun akk deg taddart tuwi-asen-d s lexbar, teẓra anwa i ɣer yerna uqcic, tin iwumi d-teɣli tadist, teẓra anwa i d-ixṭṭben anwa i d-izewğen, anwa ara yxetnen d wayɣer ggten yinebran, teẓra anwa i yeččan iḥeckulen anwa i as-ten-iseččen d wanwa i asen-id-yekksen...
Nekk d acu i y-iğğan ḥemmleɣ tamɣert-a, d tbɣest d ssber tesɛa, ɣas ma yella ulac lmeḥna ur tt-nezgil, imi yiwen n mmi-s ay tesɛa nɣan-t lğund deg Zzan, yedda deg leɣlaḍ n temsalt n lablwit (Affaire de la bleuite), ma d argaz-is, Dda Beẓẓa ah, ad fell- as yeɛfu Rebbi s lxir nɣan-t yiserdasen n Weğda deg tnekra n 63, Nna Tayaqut urğin tekkis afus-is deg Rebbi melmi tt-tluɛaḍ ad tezmummeg. Teqqar kan win yufan ad isew izir uyefki, ɣur-s takka n uwren d ukemmic n yiḥbuben, d tiqit n zzit ad iḥmed Rebbi ad t-yecker. Lferḥ-is mi ara tili tmeɣra neɣ d leɛwacer, d tin kan i tagnit ideg ara tečč azeɣbub n tqeṭṭiḍt.
Zik qqaren-d, yeğğa-as-d urgaz-is taɣeggaḍt n wakal niqal ula d tin werten-tt ilewsan-is deg-s, ğğan-as-d timeddict ula d tin ur as-d-teggri imi sin i d-iɛedda ubrid n ukerrus ...
Aucun commentaire:
Enregistrer un commentaire