Acercar n Yimeɣninen - Aglam n wadeg s tikli - Mass Musuni Ṭayeb
Tasɣunt ASELMAD uṭṭun wis 8. Yennayer 2021
Tudrin n tmazɣa d izurar ɣef yidurar, yal yiwet tcebbeḥ d tislit ɣef yidurar, d agerruj n talsa, tessebgan-d yiwet n ccbaḥa d thuski d tfulki yettudammen d sser, tamurt n Leqbayel d talelluct, tiɣaltin , idurar, isaffen iɣezran, insisen d tmedwa, tiregwa d yicercaren .
Akken kan ara k-yefk ubrid ɣer tudrin n Leɛzib, sya usya d isekla, abrid yezzi idewwer, isawen srid qbala ar Yiɣil, timnanḍin mzuzarent ta deg ta, myuṭṭafent afus deg ufus, mi d-teffɣeḍ i temdint n Leɛzib ad d-taɣeḍ abrid alamma d taḥeccaḍt, zzi kan ɣef zelmeḍ abrid ad yebdu tuzzya tunnḍa alamma tuḍeḍ akal amellal, dinna abeḥri ikeččem turin yessifsus ɣef wul, akken kra ad teṭṭerḍqeḍ Iɣil n Waḍu , amḍiq-a iwehha dayen kan syinna ad d-tebduḍ ad d-tettwaliḍ tamdint d akessar , ussan n waḍu dinna d taɛeǧǧaǧt yettsuḍu-d irennu yetthubbu yeffus zelmeḍ, ḍegger kan tiṭ-ik ɣef tzelmaḍt ad twaliḍ taddart n Ɛiyac, asmi tella di zzman-is teččur d imezdaɣ, tura d tasusmi, yezdel lxuf deg-s, segmi amezdaɣ aneggaru yenser syin melmi kan.
Abrid ur ɣezzif mi ara tkemmleḍ tikli ad tkecmeḍ Ibacaten neɣ Imrabḍen, ixammen mferzaɛen wa nnig wa ddaw ubrid, rrif rrif tizeɣwa mcuddent ta deg ta, akken kan ara teffɣeḍ seg-s ma tḍeggreḍ allen nnig-s ad twaliḍ aɣerbaz amenzu n taddart (Muḥend Ulhanǧ ) iseqqef s uqermud d azewwaɣ, ibedd di tiɣilt yessawal i tmussni, yiwet n ddura i d-yeggran akken ad nekcem taddart Imaɣninen, amzun akken yessawal-d ssut n yimeɣrasen yemmuten ɣef tlelli, ha-tt-an Tiɣilt Iṭarnac. Udem d udem nniḍen , tettmar-d tfulki d ccbaḥa dayen kan, allen tteccḍent akkin akka akken ad walint, ddaw, nnig, yeffus, zelmeḍ, syinna ad ak-id-iban d akessar ar tala Luli, Acercar n Yimeɣninen.
Acercar, yezyeb aṭas. Qqaren-as daɣen Asif umezyab, yettazzal d aman, yettfeǧǧiǧ yesrugmut ad as-tesleḍ si lebɛid ittawi-d tizlatin n lḥif d uɣilif n tumert d lferḥ. Aman deg-s ur ttfakan, ttazzalen-d si tɣaltin n Yiɣil d Yimdunen ideg ur tettfakka tzegzewt, sya usya mɣin-d yisekla, d yimɣan n yal tawsit, teɣzi-s azal n 50 lmitrat , di tehri azal n 20 tikkwal 10 n lmitrat, di tefsut timeqqwa-s ttuɣalent d initen am teslit n unẓar, d aggus n tteryel, tiɣimit din tesnubgay-d iḥulfan ilewwaɣen, yessifsus ɣef wallaɣ d wul taẓẓayt, issettuy iɣeblan d zzhir n temdinin.
Yettaf deg-s iman-is yal aɛeyyal n twennaḍt, aseklu, imɣi, ajeǧǧig d ufrux, ittak nnuba i tudert, imezdaɣ d yilmeẓyen n taddart ttnubguyen ɣer din timeddiyin aladɣa deg wussan n tefsut, rrif- is llant tmizar zzint-as-d amesyas, rezzunt-d ɣer din di tallit n teknisya (ḥeblemluk) d uzemmur, ad tesleḍ kan i leɛwaq tuẓẓafin d usebrireḥ n yimeksawen, d wujaq n yiqrar mi ttmerriḥen, d kra n yilmeẓyen yekkaten snitra, tjemmaɛ-iten-id tezlit taqbaylit, ttawin-d ɣef tlufa n tudert n yal ass, ɣef tirga, ɣef usirem, tettun iɣblan d unezgum, ttaran-d i wudem taḍsa, tettfukti tegmat d tlelli din. Am waṭas n yiberdan d tudrin , yezdeɣ-itent tura layas d tsusmi, anda akk ayen iɛeddan?! Ula d iberdan msan fkan nnuba i yinijel, yemɣi-d lxuf deg umadaɣ. Acercar ifud tura, ifud ɣas ma mazal yessawal-d mi ara yettseyyix s waman, yessawal-d i wussan ad d-uɣalen, i tarwa-s ad d-smektin ussan-nni, i yimerriyen d yinebgawen ula si tmura niḍen i t-id-yettmerrin zik nni.
Ay acercar n taddart-nneɣ, kečč d inigi n wayen iɛeddan, aqel-aɣ akken nella iḍelli, ad d-nuɣal ɣer-k yal tameddit, ad d-ncebbeḥ tiblaḍin mi asent-nettezzi zik-nni, ussan n temẓi fkan iẓuran deg-neɣ, tamurt ad d-tessawal ahaw ad as-nerr awal, ad d-neḥyu iḍelli ad t-nerr xir n zik-nni, tudrin ad tent-yeččar usirem, adrar iẓẓel-d irebbi i tarwa-s, tamurt teffud, ffuden tarwa-s.
