Aḍris agelman n umdan: Akli. Portrait: Akli.
Akli ungif, Remḍan Uslimani.
HCA 2004, (isebtar 2, 3, 4).
Akli d amdan yellan d tidet, mačči d win d-yesnulfa wallaɣ. Iεac gar 1929 akked 1980 deg yiwet n taddart seg Yigawawen n lεerc ameqqran At Ubeṭrun.
Akken, Akli yettban am tqejmurt. Ikersmumi si lḥif, maca iqewwa. Gar uqerru d yiḍarren, ur telli ṣṣura : d taxsayt n usendu. Hraw, yeččur abrid … Deg yimi n Wakli, ttbanen-d sin n yiceqfan n tuɣmas deg uɣesmar n ufella, myenṭaden almi gan am yiwet n tuɣmest, maca mmalent ɣer tama tazelmaḍt. Yiwen n uceqquf nniḍen annect n sin-nni deg uɣesmar n wadda. Tuɣmas i tlala yid-sent d tiberkanin wissen seg wacu? Akli yexḍa ccemma, neɣ igirru, neɣ ccrab. Yelha kan d laẓ-is …
Akli d aqeddac. Ccɣel-is yezga yefrez. Ma yenqec taferka tufaf, ma iqedder iqjemyar, ijmeε ticeqlalin, yessazdeg amkan, ma yefres tineqlin cebḥent … Lḥasun, leqdic-ines meṛṛa izehhu win t-yeẓran. Гur-s, ttemsazzalen wat taddart wi ara t-yesxedmen. Anwa ara d-iṣaḥ Wakli?
D acu kan, ur yessin ad yeḥseb, ur yeẓri anda ddan wussan, ur yeẓri ma terεed neɣ tewwet.
Aucun commentaire:
Enregistrer un commentaire