Imeddukkal: aḍris agelman.
Aglam n umdan - Portrait.
“Les deux amis”
D tasuqqilt sɣur : Salem Muḥend.
Yidir d Yuba a-ten-id uɣalen-d seg uɣerbaz.
Yidir yuɣal d ameqqran, yennerna mliḥ, ɣur-s qrib mraw d yiwen n yiseggasen deg
tudert-is.
Acebbub-is d awraɣ am wureɣ, kersen
wanẓaden deg-s, icubaɣ rran tawenza deg yidis, allen-is d timeqqranin brarḥent,
ṭṭurcent. Yuba, mmi-s n udrum-is, ila anagar ṣa n yiseggasen deg tudert-is. Meẓẓi
mliḥ di lqedd. Taqerrut-is d tubrint, tekkernenni am tciret n uḍar, timeẓẓuɣin-is
d timeẓẓyanin, ayen slant skelsent-t, leḥnak-is d iberkanen ad as-tiniḍ zzan
seg yiṭij, udem-is yezga yennecraḥ, taqemmuct-is tettecmumuḥ, tuɣmas-is d ticebḥanin
am udfel, yettcercur d sser dayen kan.
Yal ass, sin-agi n warrac ddukulen, ttaɣen adrid n uɣerbaz,
teddun afus deg ufus, wa ur yettaǧǧa wayeḍ, ttemzukraren kan di sin. Tturebban
i sin yid-sen, ur xebbcen, ur ttkerricen, ayen n dir xḍan-as, urǧin ttnaɣen deg
yiberdan neɣ ttawin-d tilufa i yimawlan-nsen. D ukyisen, mi ara ten-id-temlaleḍ,
ur ten-tzewwireḍ ara ɣer wazul. Mi ara d-ffɣen seg uɣerbaz, teddun-d srid s
axxam, ur tezzin ur tennḍen deg yiberdan. Ferzen lecɣal-nsen akken ilaq,
ussan-nsen ččuren d tigawt. Mi ara awḍen s axxam,yal akud deg-s amaynut. Cwiṭ i
uqesser d wurar, cwiṭ i ulmud d unadi alamma gnen.
Deg yimi n medden, ala win ara d-yinin fell-asen ayen
yelhan: d arrac uḥricen, tturebban.
Aucun commentaire:
Enregistrer un commentaire