Agni - Aglam n wadeg - Salem Zenya

Aḍris agelman - Aglam n wadeg
Agni - Salem Zenya -Tafrara.

     Agni, d yiwet n taddart i d-yezgan ger yiɣezran ilqayanen d irgel, ɣummen yidurna n tidekt d uẓebbuj. Msutraren almi mlalen ɣer tewwurt n uzaɣar am sin n yizerman. Zzhir n waman mi skefkufen d usčewčew n yigḍaḍ yettali almi d taddart.

     Agni yefferkekkin d tiferkiwin am yal taddart i as-d-yezzin, iger iman-is deg umadaγ n uzemmur, tixerbin, tiselnin d wurtan, i as-ittekksen laẓ; i as-d-yettaran tili. Urmi n wannuyen, mɣin-d deg-s tẓurin, tiṛemmanin d kra n yizegza, imi din kan i wejden waman. S-nnig n taddart d adrar n zzan.