Aḍris agelman n umdan: Lxuni - Ʃmer Mezdad

Aḍris agelman n umdan: Lxuni.
Ʃmer Mezdad Iḍ d wass
Portrait: Lxuni.

        Aqcic n Ɛedni, yiwen ur yessin isem-is. “Lxuni” kan i as-qqaren. Izufriyen deg lluzin ttlaɛin-as akk Lxuni. Dɣa ula d at taddart-is akka i as-ssawalen.

Lxuni d yiwen bu leḥnak, ur ikeččem ara deg tewwurt, aɛebbuḍ-is ad as-tiniḍ s tadist. Mi ara icennu, yettuɣal d azewwaɣ amzun d ajiḥbuḍ. Tidi ad tettceṛcuṛ, allen-is ad as-tiniḍ ad d-neṭgent seg twenza-s, ma d acebbub-is yettembiwil amzun d izerman. Yeɛdel akk d yizufriyen akken ma llan, ulac win ur t-nessin. Ḥemmlen-t akk. Ɣas yefqeɛ ur as-ttaṭṭafen ara tuḥsift. Yernu axir win i t-yesɛan d aḥbib. Ad yili Ṛebbi d uɛdaw-is: deg lkantina, d netta i asen-iferrqen tagella. Aṭas iwumi yenna: ad teččeḍ ma yugar-d. Win i t-yesserfan, ass-nni ilaq ad yuẓum…

Ma d taqbaylit tegzem deg yimi-s am waman… Awal n Lxuni ɣur-s azal ameqqran deg lluzin, acku yessen anda yekkat. Ma d imɣaren, yeẓra tin i asen-d-yettawi: ad iṣelli ɣef nnbi, ad isemmi, dɣa nutni ad fsin, ad as-inin aqcic-agi iles-is d tament, ul-is d azeddgan…