Amesmar n Ǧeḥḥa - Tamseḍsut - Auguste Moulieras

Aḍris ullis, tamseḍsut.
Amesmar n Ǧeḥḥa - Le clou de Djehha.

Auguste Moulieras. Seg:
Les fourberies de Si Djeha.

        Yiwen wass, Ǧeḥḥa yessenz axxam-is axaṭer yeḥwaǧ idrimen. Yuɣ-it yiwen fell-as. Yenna-as Ǧeḥḥa: “Ha-t-a-n ssenzeɣ-ak axxam, lameɛna ay ameddakkel, amesmar-agi yellan yenta di lḥiḍ, ur ak-t-ssenzeɣ ara! Ad yeqqim d ayla-w! Ɣur-k ass-a azekka ad d-tiniḍ tessenzeḍ-iyi ula d amesmar! Axxam tura inek, ma d amesmar ad yeqqim inu”. Yenna-as-d winna yuɣen axxam: “Yelha a Ǧeḥḥa, qebleɣ, axxam d ayla-w, ma d amesmar d ayla-k!”

        Amsaɣ-nni yeḥseb deg wul-is: “kellxeɣ-t, axxam uɣeɣ-t s rrxa, amesmar-agi ur iyi-yerzi ara! Acu ara yexdem yis-s!” Ǧeḥḥa, iruḥ ɣer yemma-s, yenna-as: “A yemma, acḥal aya nekkni nettɣimi i laẓ, ha-t-a-n ass-a ssenzeɣ axxam nneɣ ad naf s way-s ara d-naɣ ad nečč!” Tenna-as yemma-s: “Annaɣ a mmi, tessenzeḍ axxam! Laẓ yezga yenɣa-aɣ, tura ad nernu ad neggan di lexla!” Yenna-as Ǧeḥḥa: “A yemma, ur ttaggad, ur nettɣimi ara i usemmiḍ d ugeffur, ẓriɣ amek ara d-rreɣ axxam!...”