Texte descriptif - Portrait
Baba Ɛamer - Aglam n umdan
Ɛemmi Ɛamer, d netta i d ameqqran gar watmaten n baba, dɣa ɣef waya i as-nessawal Baba Ɛamer. Ilul uqbel ṭṭrad n uslelli aɣelnaw s sin n yiseggasen. Setti teqqar-iyi-d, imiren ḥaca netta ay tesɛa, asmi i d-ilul i tuɣ tafat deg lḥara. Ferḥen yis-s yimɣaren d urgaz-is. Ula d nettat tefraḥ d ayen kan acku di tallit nni d dderya ara iḍemnen iɣimi n temṭṭut deg uxxam- is abeɛda ma yella d aqcic i d-terba. Lḥif n yimiren ur yezgil yiwen, baba-s yunag ɣer lɣerba akken ad d-yexdem ɣer tmurt. Baba Ɛamer yekcem ɣer uɣerbaz amenzu teldi Fransa deg temdint n Larbɛa Nat Iraten.
Baba Ɛamer, mi ara iteddu iḥemmel ad yexdem lḥes ama s yiḍaren-is neɣ s taɣect-is, amedya mi ara d-yekcem ɣer lḥara ad isneḥnaḥ neɣ ad iṣarbeg tawwurt ; armi d taggara-agi i ffaqeɣ ayen ixeddem akken ; akken ad d-iseɛgen belli atan la d-itteddu. Am unebdu am tegrest tezga lbista ɣef tuyat-is tihrawanin akked tcacit n Pari ɣef uqerru-s. Mi ara ileḥḥu neɣ mi ara d-yuɣal seg uxeddim, deg ufus-is aqrab ideg yettawi idlisen akked yittafttaren ad as-tiniḍ d tamussni i yesɛan iḍaren tetteddu ɣef tmurt, Yeččur uqerru-s, kra n win yettnadin ad yissin kra ad yeqsed Ɛemmi.
Di tbeddi d aɛlayan, d alemmas deg tuzert. Ccib yessa ɣef tewwura n uqerru-s. Udem-is imserri yessawal i rrbeḥ. Mi ara yeqqar kra n udliṣ neɣ lkaɣeḍ neɣ aɣmis yettrusu nwaḍar n tmuɣli, ma yella d iɣimi kan i yeqqim, ittɛelliq-itent ɣef umgarḍ s lxiḍ. Askud- ines yemsed, lewhi-is yezga ɣer sdat. Tuɣmas-is ttbanent-d d ticebḥanin yerna seggment akken iwata, yesɛa yiwet n tuɣmest n lfeṭṭa, trennu-as di sser i useḍsu-ines.
Akken yenna Lwennas Maɛtub : « a wid yeɣran, mmlet i yimeɣban, ssizdget taswiɛt». Aka ula d Baba Ɛamer, ur yelli d win yettɣulun seg wayen yesɛa, tamussni-ines izerreɛ deg-s am yirden. Iles-is yeḥdeq, yir awal ur t-yesɛi, d aɛewwaj n wawal ; yal mi ara d-yeldi imi-s d awal i ineffɛen ara d-isuffeɣ neɣ mulac ad t-yezzemm akken qqaren imi izemmen ur t-keččmen yizan. Ma d ul-is yeḥreq, ittɣiḍ-it lḥal mi ara iwali lexṣara neɣ mi ara iwali lefɛayel n ddiri yefkan iẓuran deg tmetti. D amdan yebɣan abeddel, yezga iweṣṣa ilmeẓyen d tlmeẓyin ad as-tiniḍ medden akk d arraw-is. ittenddar-iten ad ṭṭfen deg tjadit- nsen ad ɛanden deg tmura yuẓan ɣer zdat deg wayen yelhan, yeqqar : « yelha ma neṭṭef deg wayen nesɛa, ad d-nernu ayen yelhan seg teɣrmiwin niḍen ».
Lukan akk imdanen gan am baba Ɛamer neɣ xarṣum ad ilin s waṭas am netta. Timetti ad tseggem, Aman ad uɣalen ɣer tregwa-nsen. Tikli dima ɣer sdat i uzekka n tafat. Nekkni s yilmeẓyen n udrum-nneɣ nettawi-t d amedya ; d abrid-is akked tektiwin-ines i neṭṭafaṛ.
Aḍris sɣur mass Belɛidi Lyas
Tasɣunt aselmad, uṭṭun 3
Yebrir 2018
Aucun commentaire:
Enregistrer un commentaire