Djehha et l'âne, et les deux voleurs.
Ǧeḥḥa akked uɣyul, d sin yimakaren - Tamseḍsut
Iruḥ yiwen wass Ǧeḥḥa ɣer ssuq, yuɣ-d aɣyul icudd-it-id s umrar la t-id-yezzuɣur.
Tebɛen-t-id sin yimakaren. Iruh yiwen yefsi-d amrar-nni, iga-t i temgarḍt-is, wayeḍ yeṭṭef aɣyul-nni, yerwel yis-s mebla ma ifaq Ǧeḥḥa. La ileḥḥu abrid, abrid, cwiṭ kan yezzi ɣer deffir, dɣa iwala d amdan i icudden ɣer umrar-nni mačči d aɣyul, yewhem, dɣa, yenna-as: Anda-t uɣyul-nni? Yerra-as-d winna: d nekk. Yenna-as Ǧeḥḥa: Amek akka yeɛni? Yenna-as: Ur ttaɣeɣ ara awal i yemma dɣa tedɛa-iyi, tenna-d: ad ak- yerr Ṛebbi d aɣyul. Mi d-ukiɣ ssbeḥ ufiɣ-d iman-iw d aɣyul, dɣa, tuwi-iyi ɣer ssuq, tessenz-iyi i winna uɣur iyi-d-tuɣeḍ. Ma tura aqel-i ad ḥemdeɣ Ṛebbi imi iyi-tsemmeḥ yemma uɣaleɣ-d d amdan. Yenna-as Ǧeḥḥa: Ceyleleh a ddunit, amek ad k-sqedceɣ kečč d amdan! Ruḥ ddu d ubrid-ik. Yefsi-as amrar-nni, yenna-as: maɛna ɣur-k ur tettaɣeḍ ara awal i yemma-k! Yerfed allen-is s igenni yenna: ad d-yefk Ṛebbi xir n wayen iyi-yekkes.
Tezzi-d ddurt, yuɣal Ǧeḥḥa ɣer ssuq ad d-yaɣ aɣyul, dɣa, yufa aɣyul-nni i d-yuɣ ddurt iɛeddan. Yuẓ ɣur-s, imekken imi-s ɣer umeẓẓuɣ-is, yenna-as: ay amcum, yak nniɣ-ak aɣ awal i yemma-k, ɣur-k ad tt-tesserfuḍ! Ccah deg-k, tuklaleḍ ayen yeḍran yid-k.
Saɛid Buda, ass n 6 di yunyu 2016.
Seg uɣmis “La dépêche de Kabylie”
Aucun commentaire:
Enregistrer un commentaire