Am wass-a - Ɛmer Tiɣilt

Aḍris ullis: Am wass-a.
Ɛmer Tiɣil, Izen amaziɣ

    Cfiɣ am wass-a mi d-yusa xali. Ibedd-d deg yimi n tewwurt, iban-d wudem-is werreɣ, yexcawet, icenfiren-is kkawen, anyir-is yekres, allen-is zeblent-d, iban fell-as yerfa.

    Gma yeṭṭes, yuɣ-it lḥal di dduḥ, sin yiseggasen di leεmer-is, ur ifaq ara. Nekk ɣur-i imir-nni xemsa yiseggasen, faqeɣ i kullec, fehmeɣ kullec. Am win ineqren iḍran-agi s umenqar d ufḍis deg wallaɣ-iw. Teddem-d yemma iceṭṭiḍen-is, tsenna-ten di tiɣyalin. Ɛebban snat i uɣyul, yiwet tewwi-tt ɣef uqerruy-is. Ffɣen si tewwurt, tmuqqel-d yemma ɣer deffir, udem-is merra yebzeg seg yimeṭṭi, allen-is ruḥent am wakken dreɣlent, idel-itent wagu.Jeddi yeṭṭef-iyi seg ufus, nekk jebbdeɣ, netta ijebbed. Iserrem ufus-is fell-i amzun d ssiman. Akken ẓriɣ ur zmireɣ ara ad ssenesreɣ s lǧehd-iw, εeddaɣ ɣeẓẓaɣ-t, uwiɣ-d tacriḥt seg ufus-is. Isuɣ ɣur Rebbi i t-id-ixelqen, sakin isserreḥ-iyi.

    Ffɣeɣ si tewwurt n useqqif am umsuḍ. Muqqleɣ akka d wakka, sakkin qqerseɣ d tazla, ḥulfeɣ i yiḍaren-iw ur ttrusun ara ɣef wakkal, gar yigenni d wakal i ruḥeɣ. Jeddi iḍfer-iyi-d. Qeḍεeɣ-ten ɣer wuffuɣ n taddart, ddaw lemqam n sidi Ḥend Welqaḍi. Ssawaleɣ s ṭṭelq n taɣect-iw : A yemma ! Rǧu-yi ! Walaɣ iḍaren n yemma ulwan, teɣli-as teɣyalt-nni n yiceṭṭiḍen, tsekker am ssnem, ur tezmir ad d-tenṭeq. Inṭeq-d Xali, yenna-yi : Uɣal syin s axxam, ay aqerruy n lmeḥna, uɣal neɣ ad k-ineɣ jeddi-k.

    Hata-a jeddi yewweḍ-d, ikemmec-iyi, yezzuɣer-iyi s axxam. Yemma d Xali kemmlen abrid nsen ; akka i ttmuquleɣ deg-sen teddun, ttibεiden, ttuɣalen d imecṭuḥen, almi ɣaben akk ulac-iten, ɣaben ɣef wallen-iw.

Ɛmer Tiɣil, Izen amaziɣ, uṭṭun 05.