Taddart n Ikeǧǧan (Tifra) - Aḍris agelman - Aglam n wadeg

Taddart n Ikeǧǧan (Tifra) - Aglam n wadeg, n taddart

© Image copyright WikiPedia

    Tezga-d taddart n Ikeǧǧan deg tɣiwant n Tifra, asun n Sidi Ɛic, tawilayt n Bgayet. Qqaren-as taddart n Ikeǧǧan, maca ɣer tidet d lɛerc i d-ijemɛen azal n seddis (06) n tudrin yeddukklen: Tasga, At Ɛacur, At Meḥyu, Tawrirt Uɛisa, Tafrawt d Ugni. Tudrin-a ddukklent ama deg tmezduɣt, ur msebɛadent ara ta ɣef ta, ama deg yidgan iɣer ttemlilin yimezdaɣ, ama deg leqdic d wansayen, ɣef waya, i tuɣal amzun d yiwet n taddart.

    Seg tama n ugafa, tḥerr-itt-id taddart n Lqelɛa Ufella. At Ɛelwan (Akeffadu), seg unẓul d umalu, ma seg usamer d tiẓegwa d ubrid yessuffuɣen ɣer udrar d teẓgi n ukeffadu.

    Daxel ad tt-naf tesɛa aɣerbaz alemmas i d-yezgan deg taddart n Tesga, yiwen n uɣerbaz amenzu, lbusṭa, axxam n yilmeẓyen, timkerḍit n tɣuri, taska taɣiwant (antenne communal) d wammas n usejji deg tama n Iɣil n Tala. Tlata tɣilusin deg Iger Isemnan, yella daɣen dinan umraḥ n Ikeǧǧan, dinna i d-ttemlilin ama d ilmeẓyen neɣ d imeqqranen i umeslay d usezri n wakud. Annar amecṭuḥ, d sin d imeqqranen, yiwen deg Tizi, lqaɛa-ines d akal, ma d wayeḍ d amaynut deg Ugelmim n Tizi, s leḥcic aragmawan (artificielle) yettwaxdem akken ilaq.

    Imezdaɣ n Ikeǧǧan ttsewwiqen ɣer ssuq n Sidi Ɛic, tebɛed ɣef temdint-a s 16 Km, ɛlayet ɣef lebḥer s wazal n 700 n lmitrat, ɣef waya i tt-yettaṭṭaf udfel qrib yal tagrest.

    Ad naf tuddar Ikeǧǧan, yal ta ɣur-s lǧameɛ n tẓallit, deg-s daɣen i d-ttemlilin wat tuddar d tesquma-ines, yal mi ara nnejmaɛen i usqerdec n temsal yerzan taddart.

    Ma nuɣal-d ɣer leɛwayed d wansayen, ad naf Ikeǧǧan, am nettat am yakk tudrin n Leqbayel, teṭṭef deg wansayen n tjaddit, tettili tegmat gar yimezdaɣ-is, mazal tiwizi d tmecreḍt, alqaḍ n uzemmur, aḥuccu n tuga, takessawt d lxedma n tebḥirin. Deg yal taddart, mazal lxedma n tejmaɛt (tiwizi) gar yimezdaɣ, i uqɛad n wayen ixuṣṣen d lebni d unegmu n taddart.

    Deg yidles, yal mi ara d-teḥḍer tegnit, ama d yennayer, tafsut n Yimaziɣen neɣ amenzu n wunbir, yal taddart acu n leqdic adelsan i d-tettheyyi, akken yis-s ad t-tesfugel, yerna ad d- kkren warrac imecṭaḥ s leḥmala n tmagit-nsen. Tettili-d tɣilust taseklant qrib yal ayyur deg temkerḍit.

    Ma nuɣal-d ɣer umezruy, ad naf tamnaḍt n Ikeǧǧan ɣur-s amezruy d alqayan, uqbel yakan ṭṭrad n Fransa, maca tekki daɣen s lǧehd deg tegrawla n (1954-1962), imi yal taddart, tsebbel ma drus 20 n terwiḥin d iseflan akken ad d-tḥelli Lezzayer timunnent-is, ula d lxalat kkint.

    Deg yiseggasen-a ineggura, yettili-d kra n unegmu, ama d aqɛad n yiberdan n ukerrus, ama d anekcum n internet, aman d lgaz. Maca drus, imi yettili-d uɛeṭṭel deg yisenfaren sɣur imasayen.

Khaled Achoui.

Tasɣunt ASELMAD

Uṭṭun wis 8. Yennayer 2021