Aεeqqa akked zzit
Aḍris asegzay
Bulifa Si Ɛmer u Saɛid
Akken ara k-inin yewwa uzemmur, ad nruḥ ad neddem imextafen d tqecwalin ɣer ucraw d ulqaḍ, win izemren yesεan imdanen, ad yexdem rrẓeq-is s ufus-is atan iban, ma d wayeḍ, win yellan iman-is, ur nezmir ara ad t-yexdem, ad as-yeṭṭef iwiziwen ara s t-id-icerwen, ara s t-id-ileqḍen. Asmi ifuk, yenejmaε-d akk ɣer uxxam d aεemmur deg yeεricen ad tebdun imiren s lxedma, wa d arkaḍ deg lberka, wa d iẓid deg lemεinra.
Win ẓẓaden medden d amenzu, d win yewwan nezzeh, i d-yeɣlin iman-is mebla acraw, i d-yettwaleqḍen d aεeqqa deg tmurt. Wanag win n ucraw ttaǧǧan-t d aεemmur deg uεric, yettɣima armi tḍal-d fell-as tefsut d yiṭij. Imiren ad neǧǧren tiqaεtin, deg umkan yewεan iṭij , ad tent-selɣen. Mi kkawent ad bdun iεricen d asuffeɣ ɣer ufsar. Ayagi akk d tilawin i t-ixeddmen, yettekka deg lecɣal n uxxam ; ma yella d irgazen llhan d wid n berra, yal wa d ayen yeεna : bu-tkerza d takerza, bu-ssuq atan iban.
- Acu d lmeεna n ufsar i tfessrem azemmur deg tqaεtin i yiṭij?
- Nfesser-it send ad yettwarkeḍ neɣ ad iẓeḍ, iwakken ad t-ffɣen waman, yerna ad as-yekkes rrukes ma yella deg-s. Mi yeḍleq deg tqaεet, ad taffeḍ tameṭṭut deg tlemmast la trewwi deg-s s yifassen-is am tin ifettlen seksu, ma yella yenejmaε s ṭṭul n tegrest, yeqqim deg teεrict.[...]
Bulifa S.A. ; Tarrayt n tutlayt. Sb.137
Tizrigin n tdukkla tadelsant tamaziɣt
Aucun commentaire:
Enregistrer un commentaire