Aẓru n War - Aglam n wadeg s tikli - Sidhum Kusayla

Aglam n wadeg s tikli

Sidhum Kusayla

Aẓru n War

     Aẓru n War, d taddart yellan di lqern wis 18 (1730-1750). Akken i d-ulsen yimɣaren n zik, amezdaɣ amezwaru n taddart-agi qqaren-as, Umniɛ bu Mejjan, qqaren-as akka imi i yesɛa claɣem d imeqqranen yerna bernen.

     Umniɛ bu mejjan iruḥ-d si taddart n Arbi i d-yezgan deg Yiflisen, irewl-d netta akked ukkuẓ n warraw-is, Muḥend, Uhebbi, Saɛdi, akked Sliman. Irewl-d imi as-nɣan akk arraw-is niḍen, yeṭṭef-d abrid-is ileḥḥu, ileḥḥu armi yuweḍ ɣer tlemmast n teẓgi, anda i d-yufa yiwen n uẓru d ameqqran, imir yeqqim yezdeɣ ddaw-as akked warraw-is.

    Semman-as i taddart-agi, Aẓru n War imi yella deg-s yiwen n uẓru d ameqqran, yettidir fell-as wayrad dɣa qqaren-as i taddart-agi Aẓru n Wayrad neɣ akken i as-qqaren tura Aẓru n War.

    Aẓru n War, d taddart di tɣiwant n Mizrana, deg ugezdu n Tizi Uzzu, tebɛed azal n 7 n yikilumitren ɣef temdint n Tegzirt. Aẓru n War, d taddart i d-yezgan ɣef udrar, tezzi- as-d teẓgi si yal tama. Yal tallit deg usseggas, tettak-as udem-is.

    Di tegrest, yeddal-itt udfel amzun d abernus amellal i tersa; di tefsut, tettzegziw akk s yimɣan i d-ifetḥen, imi tafsut d tasemhuyt anda i d-ttuɣal tudert imɣan. Anebdu, d tasemhuyt n uẓɣal maca di taddart-agi ur yettiqsiḥ ara deg-s uẓɣal imi i as-d-ttak tezgi-nni i as-d-yezzin si yal tama abeḥri d tesmuḍi. Amwan, d tasemhuyt anda ttuɣalen yisekla d iwraɣen, imi di tsemhut-agi i asen-ɣellin wafriwen-nsen.

    Gar wayen ideg tufrar taddart-agi ɣef tudrin i as-d-yezzin, d aman-is ḥlawen i d-ittecruruden ddaw n teẓgi yellan si tama ufella n taddart. Llant aṭas n tliwa, yal yiwet s yisem-is, gar-asent : tala, acariǧ, lxezna, lɛinṣer ufella ...